Сентябрь айынан баштап Оштун төрт паркында акысыз вай-фай коюлмакчы — аны орнотуу менен шаардык жаштар комитети алектенүүдө. Жабдыктар үчүн 260 миң сом бөлүнгөн.
Ош шаардык жаштар комитетинин төрагасы Суербек Аманиллаев шаардагы маалыматтык технологияларды өнүктүрүү максатында вай-фай орнотулуп жатканын Kloop.kgге билдирди. Айтымында, вай-фай шаардын төрт — Ататүрк, Навои, Жеңиш жана космонавттар паркында орнотулмакчы.
«Мындан сырткары атайын программа түзүүчүлөрдүн клубун ачып, бир жумада эки жолудан семинар, тренингдерди уюштурбыз деп ойлонуп жатабыз. Ошондо баарына жогорку ылдамдыктагы интернет керек болот», — деди Аманиллаев.
Бул орнотулуп жаткан аппаратуралар жөнөкөй эмес экенин да кошумчалады. Анын айтуусунда, бир эле учурда бир аппараттан 300 киши колдонуп, анын антеннасы 4 километрге чейин жетет.
«Бул биз коё турган аппаратура жөнөкөй вай-фай эмес. Бир антеннадан башка да антенна алып кете берсе болот», — деп айтты жаштар комитетинин төрагасы.
Жаштар арасында бул акысыз инернеттин ортулууусун колдогондор арбын. Бирок алардын арасында анын зыян жактарын да айткандар бар. Алардын бири — Кыялбек Куштарбеков.
«Вай-файдан чыккан толкундар адамдын ден-соолугуна зыян деп уккам, бул нерсенин бирден бир зыян жагы ушул деп ойлойм», — деди ал.
Жаштар комитети порнографиялык мүнөзгө ээ болгон сайттарга кирүүгө тыюу салмакчы. Бирок бул тыюу коомдук тармактарга таасир этпейт. Интернеттин ылдамдыгы секундасына 2 мегабайт деп пландалып жатат.
Буга чейин Ош шаардык жаштар комитети Алымбек Датка паркына көчө китепканасын орнотуп, күз айларына карата башка сейил бактарга да орнотушаарын кабарлашкан.
Сүрөт: Дастан Үмөттегин