Дүйнөнүн бардык православ чиркөөлөрүндө 7-январга караган түнү Иса пайгамбардын туулган күнүнө карата сыйынуу болуп өттү. Бишкектеги Владимир чиркөөсүндө сыйынуу кандай өткөнүнө барып күбө болуп келдик.
Рождество — Иса пайгамбардын туулган күнүнө карата белгиленген христиандардын башкы майрамдарынын бири. Майрам ошондой эле 40 күндүк орозо кармоонун бүтүшүн билдирет.
Бишкектеги православ христиандары 7-январь күнү Владимир чиркөөсүнө чогулушуп, ал жерде Рождество кызматын Бишкектин жана Кыргызстандын Епархиясынын епискобу Даниил жүргүздү.
Чиркөөгө жүздөгөн христиандар келишти. Сыйынып бүткөндөн кийин алар майрамдык салютка күбө болушту.
Орус проваслав чиркөөсү сыйынууну 7-январда («эски стиль» — Юлиан жылсанагы боюнча 25-декабрь) белгилейт.
Рим-католик чиркөөсү менен протестанттык чиркөөлөрдүн көпчүлүгү Рождествону азыркы Григориан жылсанагы боюнча 25-декабрда майрамдашат. Ал эми КМШнын аймагындагы жана Сербиядагы православ чиркөөлөрү Рождествону 7-январда белгилешет.
Бишкектеги Владимир чиркөөсү 10-декабрда ачылган. Ага чейин ал 20 жыл бою чиркөөгө келгендердин кайыр-садага таштаган акчаларына курулуп келген. Чиркөөгө 988-жылы православ христиан динин орустардын мамлекеттик дини катары тандаган князь Владимирдин аты ыйгарылган.