Өмүрбек Текебаевдин адвокаттары билдиришкендей, оппозициялык саясатчынын ишин карап жаткан судья «прокурор менен көмүскө бүтүм түзүп алган». Адвокаттар судьядан баш тартууну талап кылышканы менен алардын өтүнүчү канааттандырылган жок.
Текебаевдин адвокаты Канатбек Хасанов соттук отурум учурунда судьянын «бейтарап эмес» экенин айтып, андан баш тартууну талап кылды.
Саясатчынын адвокаттарынын оюнча, судья Айбек Эрнис уулу прокурор менен «жазышкандан кийин» сот залынан биринин артынан экинчиси чыгып кетишкен.
Оппозициячынын дагы бир адвокаты Канатбек Азиздин айтымында, прокурор Жахонгир Ботобаев судьянын чыгышына «ачык эле» көрсөтмө берген.
«Прокурор Ботобаев билдирүү жөнөткөндө судья телефонго көңүл бурган жок. Кийин ал судьяга телефонду көрсөттү. Судья телефонду алып, карагандан кийин тыныгуу жарыялады. Бул ачык эле көрүнүп турду», — деди Азиз.
Ал мындай сүйлөшүүлөрдөн максат Текебаев менен Дүйшөнкул Чотоновдун беделин түшүрүү болуп саналат деп эсептейт.
Бирок судья Эрнис уулу мындай айыптоолорду жөнү жок деп атап, өзүн судья катары четке кагуудан баш тартты.
Күбөлөрдүн көрсөтмөлөрү
Сот Текебаевдин иши боюнча төрт күбөнү суракка алууга үлгүрдү. Дагы үч киши сотко келе албай, өз көрсөтмөлөрүн жазуу түрүндө беришти.
Алардын бири Текебаев менен орусиялык ишкер Леонид Маевскийдин ортосунда ыктымал ортомчу Талант Маткеримовдун жесири Жылдызкан Ташматова болду.
Ташматова өз көрсөтмөлөрүндө айтып бергендей, анын жолдошу Маткеримов Текебаев менен орусиялык ишкердин жолугушуусун 2010-жылы уюштурган.
«Жолдошум Чотоновду тааныган жана “Мегакомго” кызыккан орусиялык кишилер менен тааныш болгон. Жай айларында ал Чотоновдун, Текебаевдин орусиялыктар менен жолугушуусун “Супарада” уюштурган», — деди ал.
Ташматованын белгилешинче, Текебаев менен Маматкеримов 2010-жылы Москвага орусиялык өнөктөштөр менен жолугушуу үчүн барган.
Сот ошондой эле Маевскийдин секретары Наталья Самсонкинанын көрсөтмөлөрүн угузду.
Самсонкина Москвадагы жолугушууда кыргыз делегациясындагы бир кишиге өз колу менен 700 миң доллар бергенин айтып, бирок ал чогулушта Чотонов да, Текебаев да болбогонун билдирген.
Маевскийдин секретары калган 300 миң долларды өзү эсептеп чыккан. Ал сотко билдиргендей, калган акчаны жетекчиси Кыргызстанга алып кеткен.
Мурдагы баш прокурор Кубатбек Байболов күбөлөрдүн «жалган» көрсөтмө берип жатканын айтып чыккан мамлекеттик айыптоо тараптагы жалгыз күбө.
Анын айтымында, «Мегакомдун» башкы директору Азат Базаркулов «мажбурлоо» менен көрсөтмө берип жатат.
Мындан мурдагы соттук отурумда Базаркулов 2010-жылы «Мегаком» уюк операторунун тагдыры талкууланган жолугушууга катышканы тууралуу айткан.
Базаркулов жолугушууга ар кандай аткаминерлер, анын ичинде Байболов да катышканын оозго алган. Бирок Байболов андай жолугушуулар эч качан болбогонун жана мобилдик оператордун тагдырын чечүү боюнча талкууларга катышпаганын билдирген.