«Ош» эл аралык аэропортунда коюу туманга байланыштуу ички жана эл аралык каттамдар кармалып турат.
«Манас» эл аралык аба майданынын басма сөз катчысы Алия Курбанова «Клоопко» кабарлагандай, 14-15 январга караган түнү саат 00:30 чамасында коюу туман түшүп, «Ош» аэропортунда учуу-конуу аракеттери убактылуу токтотулду.
«Ош аэропортунда 15-январга караган түнү коюу туман түшө баштаган. Көрүү мүмкүнчүлүгү начар болгондуктан, ички жана эл аралык каттамдар убактылуу кармалып турат», — деди Курбанова.
«Ош» эл аралык аэропортунун сайтында маалымдалгандай, Бишкекке уча турган каттамдардан тышкары Орусиянын Москва, Санкт-Петербург жана Раменское шаарларына кете турган рейстер да тумандан улам кармалып турат.
Курбанова билдиргендей, 15-январдын таңында Москва жана Иркутск шаарларынан Ошко келе турган учактар Бишкектеги «Манас» эл аралык аэропортунун кошумча аэродромуна конушкан. Каттамдар туман тарап, көрүү мүмкүнчүлүгү жогорулашы менен калыбына келтирилет.