Ош облусундагы Кызыл-Кыштак айылынын тургуну 20 жылдан бери күнөскана иштетип, Кыргызстандын аймактарындагы дүкөндөрдү гүл менен камсыздап келет. Анын күнөсканасында Голландия менен Италиядан алынып келинген гүлдөр өстүрүлөт.
Акбар Азимов Кара-Суу районунун Кызыл-Кыштак айылында жашайт. Күнөскана куруп өлкөнүн аймактарына гүл жөнөтүп иштеп келатканына 20 жылдай убакыт болуп калды.
Жаш кезинен короосуна гүл өстүрүп жүргөн багбан тажрыйба иретинде 10 сотых жерди ижарага алып иштетип көрүүнү чечкен.
«Ал жерге алгач жоогазын өстүрүп көрдүм. Кийин суроо-талапка жараша калла, альстромерия, гвоздика, гербера менен розаны кошо баштадым», — дейт багбан.
2010-жылдары күнөскана ишине баш-оту менен кирип кетип, ал гүл бизнесин кеңейтүүнү чечкен. Анын күнөсканасы азыркы күндө бир гектарды түзөт.
Учурда ал гүлдүн 20га жакын түрүн өстүрөт. Көчөттөрдү көбүнчө Голландиядан алып келишет жана сортторун улам жаңыртып турат. Мындан сырткары Италиядан алынып келинген гүлдөр бар.
Кышкысын гүлдөргө өзгөчө камкордук талап кылынат. Ал эми күн жылуу болсо гүлдөр да жакшы өсүп, багбан дагы азырак чыгаша тартат.
«Абанын табы бирдей болсун деп от жагабыз. Түнү менен уктабай чыккан күндөр болот. Убактысы менен чөптөрүн жулуп, гүлдөрдүн ар бирине маани беришиң керек, болбосо куурап калат», — деп түшүндүрдү багбан.
Бир гектар аянтты ээлеген күнөсканага кыш ичи 50 тонна көмүр жагылат. Жумушчу күч — багбандын сегиз кишиден турган үй-бүлө мүчөлөрү.
Ошондой эле Азимов гүлдөрдү жазда жыйнап алгандан кийин жерди эс алдырып, күнөскананын ордун башка жерге улам жылдырып турат.
Учурда ал буюртма менен Бишкек, Ош, Араван, Талас жана Кызыл-Кыя шаарларына гүлдөрдү жөнөтүп турат. Багбан күнөсканасынын аянтын кеңейтүүнү максат кылууда.