Премьер-министр Сапар Исаков 31-январда Жогорку Кеңеште депутаттардын алдына чыгып, Бишкек Жылуулук электр борборунда (ЖЭБ) кантип жана эмне себептен авария болгонун түшүндүрүп берди. Авария бишкектиктердин батирлеринде жылуулук берүүнү үзгүлтүкө учураткан.
Исаков, вице-премьер-министр Аскарбек Шадиев, Бишкек ЖЭБдин жетекчилиги жана Улуттук энергохолдинг жети сааттан ашык парламенттин депутаттарына ЖЭБдеги авариянын кесепеттери менен себептери жөнүндө суроолорго жооп беришти.
Парламентарийлер бишкектиктердин көптөгөн арызданууларына алып келген авариянын кесепеттерин алты күндүн ичинде жоё албай коюшкандарына нааразы болушту.
Өз кезегинде Улуттук энергетикалык холдингдин төрагасы Айбек Калиев депутаттарга аварияга бузулган насос себеп болгонун түшүндүрдү. Анын айтымында, Бишкек ЖЭБдин кызматкерлери бузулууну 5-7 сааттын ичинде оңдоого аракет кылышкан, бирок кошумча от казандарды ишке киргизүүдө дагы бир авария болгон.
Жыйында 2017-жылы жарым-жартылай аягына чыгарылып, 386 миң доллар насыя каражатын түзгөн ЖЭБдин жаңылоосу дагы бир талаштуу маселе болуп калды.
Калиев билдиргендей, жаңылоо эреже бузууларсыз өткөн, ал эми бузулуу эски жабдыкта болгон. Депутаттар 386 млн доллар эмнеге жумшалганы жана тагыраак эмнени жаңылашканы боюнча отчёт берүүнү суранышты.
«ЖЭБ 30 пайызга жаңыланган, ал адаптация менен мамлекеттик тескөөдөн өткөн», — деди Калиев.
Депутаттар мамлекет ЖЭБди жаңылоого жумшаган 386 млн доллардын коротулушун иликтөө үчүн бир добуштан комиссия түзүүнү чечишти.
Айрым депутаттар премьер-министр менен башка аткаминерлерди кызматтан кетүүгө чакырышты. Исаков маалымдагандай, ЖЭБдеги авария үчүн «толугу менен өзүнө жоопкерчилик алат», ал эми күнөөлүүлөр жазага тартылат.
Калиев кызматтан кетүү боюнча арызын берген жалгыз аткаминер экенин, бирок ага кол койбогонун премьер-министр белгиледи.