Баткен облусунун Лейлек районунда 23-апрель күнү кечке жуук жоголгон наристенин сөөгү эртеси күнү Тажикстандагы каналдан табылды. Облустук милиция наристе «каналга агып кеткен» деп божомолдоодо.
Кыргызстандык дайынсыз жоголгон беш жашар баланын сөөгү 24-апрелде Тажикстандагы каналдан табылган. Бул тууралуу Баткен облустук ички иштер башкармалыгынын басма сөз катчысы Айсалкын Эргешбай кызы «Клоопко» кабарлады.
«Лейлек районунун Арка айылында 23-апрелде 5 жашар бала үйүнөн көчөгө атасын чакырганы чыккан. Ошондон кийин ата-энеси аны таппай калган. Наристенин сөөгү эртеси күнү Тажикистандын Гафуров шаарындагы каналдан табылды», — деди басма сөз катчы.
Баткен облустук милиция бала «каналга агып кетип каза тапкан» деп божомолдоодо.
«Наристенин ата-энеси милицияга эч кандай арыз менен кайрылган эмес. Баланын өлүмү боюнча доосу жок экендигин айтышты», — деп кошумчалады Эргешбай кызы.