Парламенттик шайлоого катышкан бир нече саясий партия «Үмүт» кыймылын түзүп, басма сөз жыйын өткөрүштү. Аталган саясий кыймылга «Мекен Ынтымагы», «Реформа», «Замандаш», «Бүтүн Кыргызстан» жана «Социал-демократтар» партиялары кирген.
Партиялардын өкулдөрү Конституцияны шашылыш реформалоого каршы экенин билдиришип, алгач парламенттик жана президенттик шайлоону өткөрүү керектигин айтышты. Ошондой эле «Үмүттүн» мүчөлөрү бийликке бир катар талаптарды койду. Алар:
- парламенттик кайра шайлоону 20-декабрда өткөрүү;
- шайлоо босогосун 3 пайызга түшүрүү боюнча мыйзам долбооруна кол коюу — учурда бул долбоорго президенттин милдетин аткаруучу премьер-министр Садыр Жапаров кол коюусу керек;
- шайлоо учурунда добуш сатып алуу жана административдик ресурсту колдонгондорго жеткиликтүү чара көрбөгөн ИИМ, Башкы прокуратура жана УКМКны жоопкерчиликке тартуу;
- Борбордук шайлоо комиссиясына басымды токтотуу;
- Жогорку Кеңешти таратуу;
- партияларга 5 миллион сомдук шайлоо күрөөсүн кайтарып берүү.
«Реформа» партиясынын талапкери Азият Жекшеев парламенттик шайлоону БШК дайындаган 20-декабрда өткөрүү зарыл экенин белгиледи.
«Биз укуктук талаага бир гана ушул жол менен кайта алабыз», — деди Жекшеев.
Ал эми «Мекен Ынтымагы» партиясынын лидери Темирбек Асанбеков эгерде бийлик бул талаптарды аткарбаса нааразычылык акциялары улана турганын билдирди.
