Бишкектин Биринчи май райондук соту саясатчы жана Кемпир-Абад ишинин фигуранты Азимбек Бекназаровдун баш коргоо чарасын карап, аны 2-ноябрга чейин ТИЗО-1ге камакка алууну чечти.
Соттун маалыматына ылайык, судья УКМКнын Башкы тергөө башкармалыгынын тергөөчүсүнүн тиешелүү өтүнүчүн 14-сентябрда канааттандырды.
Саясатчынын адвокаты Бекназаров мыйзамсыз кармалганын жана тагылган айыптар негизсиз экенин айтып, аны үй камагына чыгарууну өтүнгөн.
Азимбек Бекназаров кылмыштуу кирешелерди адалдоого шектелип 12-сентябрда кармалып, УКМКнын убактылуу кармоочу жайына киргизилген.
Атайын кызматтын маалыматы боюнча, саясатчынын 2010-жылдагы апрель революциясы учурунда банк кутучаларынан жана өкмөт үйүнөн алынган акчаны уурдоого жана коротууга тиешеси бар.
УКМКдан белгилешкендей, Бекназаров акчаны адалдоого аракет кылып, Бишкекте, Ысык-Көл, Чүй жана Жалал-Абад облустарында кымбат баалуу кыймылсыз мүлктөрдү сатып алып, аларды башка адамдардын атына каттаткан.
УКМКнын басма сөз кызматы Бекназаровдун 2010-жылы жазылып алынган Алмазбек Атамбаев жана Темир Сариев менен болгон сүйлөшүүсүнүн аудиосун жарыялады.
Алардын биринде Бекназаров Атамбаевди кадрдык дайындоолордун бири үчүн 400 миң доллар өлчөмүндө пара алууга айыптап, аны жаңы революция жасарын айтып коркуткан. Мындай сүйлөшүү болгонун кийин Атамбаев ырастап, бирок пара алганын четке каккан.
Бекназаров Сариев менен сүйлөшүүсүндө 1 миллион долларды эсептен чыгаруу ыктымалдыгын талкуулаган. Кийин Сариев эч кандай акча уурдоо болбогонун, сөз болгон миллион доллар өлкөдөгү коопсуздукту камсыз кылуу үчүн бөлүнгөнүн билдирген.
Азимбек Бекназаровдун уулу Руслан Бекназаровдун айтымында, УКМК бул сүйлөшүүлөр боюнча атасын эки жолу суракка алып, үчүнчү жолкусунда камакка алган.