Маалымат саат 10:20да жаңыртылды.
Кара-Суу районунун Кызыл-Кыштак айылындагы төрт турак үйдөн 13-майда өрт чыккан. Өзгөчө кырдаалдар министрлигинен билдиришкендей, тилсиз жоону өчүрүүгө саат 20:21де жети бөлүм тартылган. Кырсыктан жабыркагандар жок.
ӨКМдин маалымат кызматынан маалымдашкандай, төрт турак үйдөн чыккан өрт саат 21:22де чектөөгө алынып бир сааттан кийин толугу менен өчүрүлгөн.
Социалдык тармактарга Кара-Суунун Кызыл-Кыштак айылында саат 20:30дар чамасында өрт чыккан видео тараган. Тасманын автору өрт болжолдуу «Отор» ресторанын жанында чыкканын айткан.
«Башында кичине эле өрт чыккан кийин жалындап кетти. Балким турак жайлардан өрт чыккандыр», — деп комментарий берген автор видеого.
Өрттүн кесепетинен жалпы 629 чарчы метр турак үйлөрдүн чатыры күйгөн. Тилсиз жоо электр шаймандарды пайдаланууда коопсуздук эрежелерин сактабагандыктан чыкканы болжолдонууда.
