Баткен облусунун Голбо айылында «Канзат» деген аталыштагы тигүү цехи ачылгандан бери болгону эки гана ай өттү, бирок учурда анда иш кызуу жүрүп жаткан чагы. Цехте түрдүү даражадагы майыптыгы бар сегиз аял эмгектенет.
Цехти айылдын жашоочусу Канзат Жуманова атайын долбоор жазып, грант утуп алгандан кийин ачкан.
Ал убакыттарынын көбүн майыптар арабасында өткөргөн мүмкүнчүлүгү чектелген адамдарга иштөө мүмкүндүгүн берүүнү каалаганын айтты.
Иш күнү эртең мененки саат 9да башталып, кечки саат алтыда аяктайт, бирок кээ бирде тигүүчүлөр андан да кечке калып калышат. Алардын бири билдиргендей, баары тең тапшырыктардын санына жараша болот.
«Биздин жакында эле ачылгандыгыбызга байланыштуу тапшырыктар көп эмес. Негизинен биздин айылдыктардын эле тапшырыктары, бирок башка айылдардан келип тапшырып берген учурлар да болгон», — деди тигүүчү Нуриса Сартматова.
Цехтин жумушчуларынын баары тең буга чейин жумушсуз болуп, өз убактыларын үйлөрүндө өткөрүп келишкен.
«Цех ачылгандан кийин кыздардын көңүлдөрү көтөрүлүп калды. Алектене турган нерселери бар, кээде эс алууга бир жактарга барабыз, айрым учурларда жумушта бийлейбиз», — дейт Сартматова.
Мүмкүнчүлүгү чектелген жумушчулар үчүн мамлекет тарабынан төлөнчү жөлөк пул жетишсиз көлөмдө, ошондуктан алардын цехте иштөөсү жашоолорун бир топ жеңилдетти.
«Дарыга акча жетпей калган учурлар өтө эле көп болгон. Цехте иштөө менен мага бир аз жеңилирээк болуп калды», — дейт Сартматова.
Анын айтымында, жумушчуларга салттуу кийимдерди, өзгөчө чапандарды тигүү үчүн тапшырыктарды беришет. Бирок тигүүчүлөр ушуну менен гана чектелип калууну каалашпайт.
Цехтин директору Канзат Жуманова цехти кеңейтип, коңшу айылдардагы мүмкүнчүлүгү чектелген адамдарды тартуу каалоосу бар экенин айтты.
Авторлор: Аймир Каныбекова, Данияр Бахридин уулу
Сүрөт: Сымбат Сагынбек кызы