Борбор калаада үч күнгө созулчу эл аралык «Оймо-2016» фестивалы башталды. Анда жергиликтүү жана чет элдик кол өнөрчүлөрдүн эмгектери менен таанышып, сатып алууга болот.
«Ала-Тоо» кинотеатрынын жанында «Оймо» фестивалы 29-июлда башталды. Уюштуруучулар фестивалдын 31-июлда жыйынтыктоочу парад менен аяктаарын айтат. Фестивалдын максаты — элдин ичинде унутта калган буюмдарды жаңыртуу жана элге тараттуу.
Бул фестиваль 2006-жылы негизделип, алгачкы жолу өткөрүлгөн. Быйыл кол өнөрчүлөрдүн башын кошкон «Оймо-2016» фестивалы 11 жолу болуп жатат.
Иш-чарага жалаң эле кыргыздар эмес, чет өлкөлөрдөн да келишет. Фестивалдын директору Динара Чочунбаеванын айтымында, быйылкы иш-чарага Кыргызстандан тышкары Казакстан, Өзбекстан, Кытай, Орусия жана Индиядан 150дөй кол өнөрчүлөр катышууда.
Бишкекте «Оймо-2016» фестивалы аяктаган соң 1-7-август аралыгында Чолпон-Ата шаарында уланмакчы.
Даярдагандар: Азирет Туратбеков, Адилет Канат уулу, Ууржан Молдокулов.