Лейлек районунун Кольцо айылындагы орто мектеп селдерден жараксыз абалга келди. Өзгөчө кырдаалдар министрлиги окуучулар үчүн үч 30 орундук чатыр бөлүп берди.
Сүлүктү шаарына караштуу Кольцо аылындагы Кайымкулов атындагы №6 орто мектеби 12-майда өткөн селден жараксыз абалга келген.
ӨКМдин мониторинг департаменти мектеп имаратын колдонууга тыюу салган.
«ӨКМ 30 орундуу үч чатыр бөлүп берди, майдын аягына чейин», — дейт ӨКМдин Баткен облусу боюнча башкармалыктын жетекчиси Алмаз Асанов.
Окуу жылынын аягына чейин он күн калды.
Мектептин директору Каныбек Эшмурзаев 16-майда чатырлар келгендигин, бүгүнтөн балдар окуусун баштаарын айтты. Төрт күн бою балдар мектептин жанындагы эски имаратта окушкан.
«Дубалда 10 саниметрден жарка кетти», — дейт директор.
Кайымкулов атындагы №6 орто мектеби 1977-жылы курулган.
Мындан сырткары, айылда маданият үйүн жана китепкананын имаратын да суу каптаган.
Премьер-министр Өмүрбек Бабанов түштүк регионго болгон иш сапарында, мектептерди курууга 4 миллиард сом каражат бөлүнгөндүгүн айткан. Бирок, бул каражаттар жаңы мектеп үчүн эмес, курулуп бүтө элек мектеп имараттары үчүн кетээрин кошумчалаган.
2012-жылдын апрель айынын башынан бери республиканын түштүк аймактарында селдер өтүп, Баткен облусу боюнча — 300дөй, Ош облусу боюнча 600дөй, Жалал-Абад боюнча 2800 турак-жай суу алдында калып, жабыр тартты.
Автор: Гүлзара Бакаева
Редактор: Улугбек Акишев
Сүрөт: ӨКМдин сайтынан алынды