Оштун борбордук аянтында «Ата-Журттун» лидерлерин кое берүүнү талап кылып жаткан митингчилер тарап кетишти. Kloop.kgнин кабарчылары билдиришкендей, аянтта ачкачылык жарыялаган митингчилер гана калды.
16:56 Kloop.kgнин кабарчылары билдиришкендей, аянтта ачкачылык жарыялаган 15 киши калды.
16:49 Шабданова кайрадан мэриянын имаратына кирип кетти – ал борбордук аянтка боз үй тигүүгө уруксат берүүнү кайрадан өтүнөт.
16:44 Тез жардам унаасы менен алып кетишкен митинг катышуучусу аянтка таңылган колу менен кайтып келди.
16:17 Партиянын Оштогу штабынын координатору Дария Шабданова мэрия имаратынан чыкты. Ал шаар мэри Мелис Мырзакматов аянтка боз үй тикпөөнү өтүнгөндүгүн айтты.
«Бул мамлекеттик администрация, аянтта үйлөнүү үлпөттөр өтөт», – деди Мырзакматов.
Мэрия боз үйлөрдү шаар четине тигүүгө гана уруксат берди.
16:08 Kloop.kgнин кабарчылары учурда мэриянын имаратынын алдындагы аянтта 50дөй киши жүргөндүгүн билдиришти.
15:52 Милиция кызматкерлери колун «чыгарып» салды делген митинг катышуучусу Максатгүл Одонованы тез жардам унаасы менен алып кетишти.
15:49 Ачкачылык жарыялаган Асылкан Абышева “Клоопко” берген маегинде кызын Нурик деген милиция кызматкери участокко алып кеткендигин айтты.
Айтымында, ал милиция кызматкеринин аты-жөнүн жана кызын кайсыл участокко алып кеткендигин так билбейт.
15:23 Аянтта калган митингчилер бир жерге топтолуп жатышат.
15:01 Аянтта 25тей гана киши калды.
14:56 Митингтин катышуучуларынын бири Асылкан Абышева 15 аял ачкачылык жарыялагандыгын билдирди.
Ачкачылык жарыялагандардын бири оозун скотч менен жаап алды.
14:45 Ош шаардык ички иштер башкармалыгынын басма сөз катчысы Замир Сыдыков эки милиция кызматкери «жеңил» жарат алгандыгын журналисттерге билдирди.
Митингчилер тарай баштады.
14:39 «Ата-Журттун» Ош шаардык штабынын координатору мэриянын имаратына кирип кетти.
14:28 Митингчилердин айтымдарында, милиция кызматкерлери боз үйлөрдү тартып алып жатканда бир аялдын колу чыгып кеткен.
Митингтин уюштуруучулары акция катышуучуларын тарап кетүүгө чакырып жатышат.
14:19 Kloop.kgнин кабарчысы мэрия имаратына 50дөй атайын багыттагы аскер кызматкери кирип кеткендигин билдирди.
14:09 Борбордук аянтка дагы 200дөй милиция кызматкер келди, деп билдирди Kloop.kgнин аймактагы кабарчысы.
14:04 Митингтин катышуучулары боз үй тиге башташкан, бирок милиция тыюу салып, боз үйдү тартып алды.
13:55 Партиянын Ош шаардык штабынын координатору Дария Шабданова менен митингтин катышуучулары президенттин Ош облусундагы ыйгарым өкүлү Сооронбай Жээнбековдун чыгып, алар менен жолугушуусун талар кылып жатат.
13:15 Митингде сөз сүйлөп жаткан аксакал Оштогу митингдер жума күнгө чейин улана тургандыгын айтты. Эгер Ташиевди ага чейин кое беришпесе нааразы болгондор Бишкекке барып Ак үйдү басып алышат, деди ал.
13:05 Kloop.kgнин кабарчысынын баамында, митингтин катышуучуларынын саны миңге жетти.
12:41 «Биз Ак үйдүн алдында болгонбуз, президент менен жолугушалы десек мүмкүнчүлүк беришкен жок. Эмнеге мурунку бийликке каршы чыккан оппозиционерлерди камашкан эмес? Ташиевди болсо камап коюшту» — деди Өзгөндөн келген партия тарапташы митингчилердин алдында сөз сүйлөп жатып.
12:35 Ош шаарындагы партия тарапташтарынын митингинде микрофон иштебей калды — алар шаар бийлигин электр энергиясын «атайылап» өчүрүп салды деп күнөөлөп жатышат.
12:28 Митингкте алгачкылардан болуп «Ата-Журттун» Ош шаардык штабынын координатору Дария Шабданова партия лидерин колдоп сөз сүйлөдү. Ал өз сөзүндө «Ата-Журттун» ар бир тарапташын Ташиевди колдоп сөз сүйлөөгө чакырды.
12:15 Митингке катышкандардын саны 300гө жетип калды, деп билдирет Kloop.kgнин аймактагы кабарчысы. Айтымында, Ош шаарынын борбордук аянтында элге «Майдан» гезитин таркатып жатышат. Басылманын ал санында «Ата-Журттун» лидери Камчыбек Ташиевди колдогон макалалар басылып чыккан.
11:25 Митингдин катышуучуларынын лидерлеринин бири Абдыла Кутпидиновдун айтымында, нааразычылык өнөктүгүнө катышуу үчүн кишилер Чоң-Алайдан, Өзгөндөн жана Базар-Коргондон келишкен.
Ал азыр Жалал-Абаддагы тарапташтарын күтүп жаткандыктарын кошумчалады.
11:19 «Ата-Журттун» тарапташтарынын митинги 4-октябрда, депутаттар Камчыбек Ташиев, Садыр Жапаров жана Талант Мамытовдор кармалгандан кийин башталган.
«Ата-Журттун» лидерлери 3-октябрда «Кумтөр» алтын кенин улутташтыруу талабы менен Бишкектин борбордук аянтында өткөн митингтен кийин кармалышкан.
3-октябрда Ала-Тоо аянтында өткөн митингтин хроникасы
Аянттагы митингтен фоторепортаж
Алар күч колдонуп бийликти басып алууга аракет кылышкан деп күнөөлөнүүдө — Кыргызстандын кылмыш кодексинде мындай кылмыштар үчүн 20 жылга чейин эркинен ажыратуу жазасы каралган.
5-майда Биринчи май райондук соту депутаттарды Улуттук коопсуздук мамлекеттик комитетинин тергөө абагына эки айга камоо чечимин чыгарган.
Кандай болгон: “Ата-Журттун” лидерлеринин баш коргоо чарасын кароо
Сүрөттө 3-октябрда «Кумтөрдү» улутташтыруу маселеси боюнча өткөн митингтин катышуучулары
Автор: Александра Ли