Баткен облусунун Лейлек райондук ички иштер бөлүмүнүн кызматкерлери жергиликтүү тургундан жарым миллион сом талап кылууга шектелген Бегалы Эргешов менен Кубатбек Бердиевдерди кармашты — бул тууралуу ИИМдин басма сөз кызматы билдирди.
Милициянын маалыматы боюнча, кармалгандар жабырлануучуну коркутуп, анын Кызыл китебин [турак-жай аянтына болгон документин] тартып алышкан.
«Экөө тең уюшкан кылмыштуу топтун лидерлери менен тыгыз байланышта болуп, кылмыштуу топтордун биринин мүчөлөрү болушкан», — деп жазылган ИИМдин билдирүүсүндө.
Кармалгандарга карата 31-октябрь күнү 170-берене менен каралган «акча талап кылуу» жана 105-берене менен каралган «адам саламаттыгына атайылап зыян келтирүү» боюнча кылмыш иши козголгон.
Учурда алар убактылуу кармоочу жайда камакта.
Автор: Алексей Ким