Ноябрдын башында Ново-Покровка айылында жоголгон балдардын сөөгү Бишкекте, Чоң Чүй каналынан табылды — бул тууралуу облустук милиция бөлүмүнөн билдиришти.
6 жашар Нурсултан Медетбеков менен 12 жаштагы Ырыскелди Шаботоевдер 3-ноябрь күнү Бишкектен алыс эмес жайгашкан Ново-Покровка айылында жоголуп кетишкен.
Кийинчерээк, 9-ноябрда Шаботоевдин сөөгү Чоң Чүй каналынан табылган, а 6 жаштагы Медетбековдун сөөгү бүгүн эртең менен табылды.
«Биринчи бала табылган жерден эле таптык», — деди Чүй облустук ИИБсинин нөөмөтчүсү.
Медетбековду анын атасы тааныды.
«Туугандары чакырылган, ал жерге атасы келип баласын тааныды», — деп билдиришти Чүй облустук ИИБсинин басма сөз кызматынан.
Тергөөнүн болжолдуу версиясы боюнча, балдар Чоң Чүй каналына чөгүп кетишкен.
Соттук-медициналык экспертиза балдарга карата күч колдонулбагандыгын аныктады.
«Соттук медициналык эксперт карап чыкты, анын алгачкы, болжолдуу версиясы боюнча, бала чөгүп кеткен. Денеси таза, учурда денеси ачып көрүүгө жөнөтүлдү», — дешти Чүй ОИИБсинин басма сөз кызматынан.
Эки бала тең 3-ноябрда жоголгон — чоң энесинин айтымында, алар Ново-Покровкадагы №3 мектептин жанындагы стадионго сейилдөө үчүн кетишкен.
Алардын жоголушу боюнча тергөөдө бир нече версия бар болчу, бирок чындыкка жакыныраагы катары алардын Чоң Чүй каналына чөгүп кетиши ыктымалдыгы айтылып жаткан.
«Ново-Покровка айлындагы үйлөрдүн бирине орнотулган камерага балдардын суу тарапка чогуу бара жаткандыктары тартылып алынган», — деп жазылган Чүй облустук милициясынын сайтында.
Автор: Алексей Ким