Ош шаарында АФКнын кубогунун алкагында Кыргызстандын “Алай” футбол клубу менен Бахрейндин “Риффасы” беттешип, оюн 0:0 эсебинде аяктады.
"Алай" футболдук клубу кыргызстандык клубдардын ичинен биринчи болуп Азия футбол конфедерациясынын Кубогуна катышууда. “Алай” 2-февралда Палестинанын чемпиону “Аль-Дахриа” клубун утуп, мелдештин финалдык баскычына жолдомо алган болчу.Аянт дээрлик көрөрмандарга толду. Уюштуруучулардын расмий бидирүүсүндө 11 миңден ашык билет сатылган. Ошондой болсо да оюн башталаарда аянтчанын дарбасын адамдар түртүп эле кирип кетишкенине күбө бодум. Аянт 15-20 миң көрүүчүгө ылайыкталган.
Оюн башталаары менен эле “Алайдын” №6-оюнчусу Шерзот Шакировдун көзүнө ылай чачырады. Буга чейин “Риффа” тарап Оштогу Акбар Сүйүнбаев атындагы стадиондун талапка жооп бербегендигин баса белгилеп айтып жаткан.
Биринчи бөлүктө “Алай” бир гол киргизди. Бирок аны калыстар “дарбазачыга каршы орой ойношту” деген жүйөө менен эсепке алышкан жок. Ошентип кошумча эки мүнөт берилип, биринчи бөлүк 0-0 эсеби менен аяктады.
Экинчи бөлүктө кооптуу кырдаалды “Риффа” тарап көп түзүп жатканы менен алардын үч оюнчусу оор жаракат алды. Муну клубдун машыктыруучусу “стадиондогу шарттын жоктугу" менен байланыштырды.
Оюн аягына чыгып, дагы төрт мүнөт кошумча убакыт берилди. Ошентип беттеш 0:0 эсебинде аяктады.