Кикбоксёр Руслан Абасовдун унаасы 27-март күнү кечинде Токмок шаарында жардырылган. Спортчу ооруканага бара жаткан жолдо эсине келбеген бойдон каза болду.
Абасовдун «Тойота Лэнд Крузер» үлгүсүндөгү унаасы Токмок шаарынын 3-кичи районуна бара жатканда жарылган.
Спортчу алган жарааттарынан улам ооруканага бара жатканда жолдо каза болду.
Ошондой эле аны менен бирге жанында жубайы да бар болгон — ал жардыруудан кийин аймактык оорканага жаткырылды. Милициядан билдиришкендей, учурда анын өмүрүнө «коркунуч жок».
«Вечерний Бишкек» гезитинин интернет-басылмасынын маалыматы боюнча, жардыруунун очогу Абасов отурган орундуктун астында болгон.
Ошондой эле версиялардын бири боюнча бул теракт болушу ыктымалдыгы айтылууда.
Азыр Токмок милициясы окуянын чоо-жайын териштирип жатат. Анда ыкчам-тергөө тобу менен сапёрлор иш алып барышууда.
Токмок шаардык милициясынын тергөө бөлүмү Кыргызстандын Кылмыш кодексинин 97-беренесинде каралган «Адам өлтүрүү» белгилери боюнча кылмыш ишин козгоду.
Учурда ыкчам иликтөө тобу кылмышка шектүүлөрдү колго түшүрүү боюнча иш-чараларды жүргүзүп жатышат.
