Парламент жол кыймыл эрежелерин бузгандарга жазапулдун арттырышын толугу менен жактырды. Эми бул мыйзам долбоору акыркы кабыл алынуу баскычында – президент ага кол коюшу керек.
“Жол кыймылы жөнүндөгү” мыйзамга өзгөртүүлөр парламент тарабынан 19-июнь күнү бир добуштан кабыл алынды, деп кабарлайт мыйзам долбоорунун автору, парламент мүчөсү Дастан Бекешев.
Катталган жазапулдардын төрттөн бир бөлүгү жол көзөмөлдөө кызматынын бюджетине кетет.
Жазапулдун көлөмү болжолдуу алты эсеге өсүшү күтүлүүдө:
Окулбаган мамлекеттик номерлерге: 3000 сом
Жасалма номерлер үчүн: 5000 сом
Унаанын терезелери пардалар менен тосулган же караңгылатылган болсо: 2000 сом
Унааны туура эмес токтотууга: 1000 сом
Жол чырак тыюу салган белги бергенде, же жол кыймылын жөнгө салуучунун ишаратына карабастан айдап өтүп кетсе: 1000 сом
Каршы тилкеге айдап чыгууга: 1000 сом
Мас абалда унаа айдаса: 1ден 20 миң сомго чейин, же болбосо 1 жылдан 3 жылга чейин айдоо укугунан ажыратуу
Унааны милициялык, же ыкчам кызматтардын автомобилдериндей боётуп алса: 2000 сом
Автобуста, же кичи автобустарда заводдо алдын ала көрсөтүлгөн нормадан ашыкча жүргүнчү ташыса: 3000 сом
Ашыкча ылдамдыкта айдаса: 500дөн 1000 сомго чейин
Жазапулдардын көтөрүлүшү жол көзөмөл кызматкерлерине да таасир этмекчи – айдоочуну эч кандай документ көрсөтпөй туруп токтоткон милиционерге, эгер ушундай учур видеого жазылып алынса, 5000 сом жазапул айып тагылат.