Украинадагы жарашуу, 4-бөлүк: Украин аскерлеринин сөөктөрүн издөө

Автор:

25/03/2015

Украин кагылышуусунун жүрүшүндө январь, февраль айларында эки тараптан тең жүздөгөн аскерлер курман болушкан. Украин бийлиги курман болгон аскерлеринин сөөктөрүн Донецк элдик республикасынын көзөмөлүндөгү аймактардан алып чыгып кете алышпайт, ошондуктан аны менен ыктыярчы топ алектенүүдө.

КӨҢҮЛ БУРУҢУЗДАР! Видеодо үрөй учурчу кадрлар бар.

Баяндоо Бектур Искендердин атынан жүрөт

Биз «Элдик эстелик» союзунун ыктыярчыларына Дебальцевого бара жаткан жолдо жолуктук. Бир ай мурун эле бул шаарда айыгышкан күрөш жүрүп, андан соң ал өз алдынча жарыяланган Донецк элдик республикасынын (ДЭР) көзөмөлүнө өткөн.

«Элдик эстелик» – курман болгон украин аскерлеринин сөөктөрүн алып кетүү үчүн мүчөлөрү ДЭРдин көзөмөлүндөгү аймакка кире ала турган жалгыз уюм.

Бул ишти алар ДЭРдин Коргоо министрлиги менен кызматташтыкта аткарышат, ошондуктан алардын эки автоунаадан турган колоннасы эч кандай атайын коштоосуз эле жүрөт.

Украин аскерлери дээрлик жарым жыл көзөмөл кылгандан кийин февралдын ортосунда Дебальцеводон чыгып кеткен унаа жолго келдик.

Артка чегинип бара жаткан маалда украин танктары менен аскердик унаалары ырайымсыз аткылоолорго дуушар болушкан.

Расмий Киев буга ДЭРдин күчтөрүн айыптоодо, а ДЭРчилер өз кезегинде украин аскерлери өзүлөрү тараптан аткылоолорго кабылгандыктарын билдирип жатышат.

2014-жылдын августунан бери «Элдик эстелик» уюму ДЭРдин көзөмөлүндөгү аймактардан дээрлик 200 аскердин сөөгүн алып чыгышкан.

Биз аталган уюмдун ыктыярчыларынын Дебальцевонун тегерегиндеги унаа жолго болгон биринчи сапарындабыз.

Айланада жарылуулардын добуштары угулуп, андан соң асманда кара түтүн пайда болууда. Бирок алар кыйла эле алыс, ошондуктан мындай көрүнүштөргө көнүп калган ыктыярчылар ага көңүл да буруп коюшпайт.

Курман болгон аскерлердин сөөктөрүн издөөдө ыктыярчылар ДЭРдин Коргоо министрлиги менен кызматташтыкта аракеттенишет.

Ошондуктан Дебальцеводо алардын катарына ДЭР күчтөрүнүн төрт аскеринен турган топ кошулду. Мүмкүн ал аскерлердин тобу учурда сөөктөрүн издеп жаткан адамдарга каршы согуштарга өзүлөрү да катышышкандыр.

Бул сүрөттө «Элдик эстеликтин» ыктыярчылары (алардын бири Батыш Украинадан) ДЭРдин согушкерлери менен биргеликте танктан украин аскеринин сөөгүн таап, чыгарып жаткандыктары көрүнүп турат:

Снаряд бул танкка таамай тийген окшойт – мунарасы бир нече метр алыстыктагы талаага учуп кеткен:

Украин танкистинин денеси өтө эле күйүп калгандыктан издөөчүлөргө күлгө айланган бөлүктөрүн гана алып чыгууга туура келүүдө.

Эгер аскердин ким экендигин аныктоо мүмкүн болбосо ДНК анализ кылууга туура келет – Украинанын көзөмөлүндөгү аймакта, анткени Донецкте андай жабдуулар жок:

Ал ортодо бир аз жакыныраак жерден экинчи жарылуунун добушу угулду. Издөө иштерине катышып жаткан ДЭРдин аскерлери анын эмне экендигин өзүлөрү да билишпейт – ал аткылоолор же миналарды зыянсыздоо иштери болушу мүмкүн:

Украин кагылышуусу башталгандан бери эң көп мина коюлган аймак Дебальцевонун айланасында болсо керек. Ошондуктан мында өтө этияттык менен иштөөгө туура келет.

Бул аймакта сапёрлордун иштеп кеткендиктерине карабастан биз асфальттан жээкке чыкпоого аракет кылабыз.

Издөөчүлөргө кыйыныраак. Алар чогултуу керек болгон украин аскерлеринин сөөктөрү чачылган талааларды аралап жүрүүгө аргасыз:

Бул джипте сөөктөр табылган жок:

Ошондуктан издөөчүлөр өз жандарын тобокелге салып, талаага жөнөштү:

Украин аскерлеринин кээ бирөөлөрүнүн сөөктөрү согуштан соң дароо эле ДЭРдин согушкерлери тарабынан жерге берилген. Андай мүрзөлөрдүн бири унаа жолдон болгону 10 метр алыстыкта табылды:

Мында аскер көмүлгөн. Бирок анын аскердик формасында даражасынын белгилери тигилген эмес, а жеке маалыматтары көрсөтүлгөн мойнундагы чынжыр боо чечилген:

Курман болгон аскерлердин сөөктөрүн издөө бүгүн да уланууда. Ыктыярчыларга укмуштуудай оор режимде, дайыма сүйлөшүүлөрдү жүргүзүп, өтө коопту жерлерге барып иштөөгө туура келүүдө.