Үшүк алып кеткендиктен Кыргызстандын айрым аймактарында быйыл өрүк начар болуп калган. Бирок ошентсе да өрүктөн алган түшүмүнө канааттанганын айтат баткендик багбан Жыргалбек Абдижалил уулу.
Жыргалбек Абдижалил уулу өрүк бактарын дарылап, үшүк алуудан бир аз болсо да сактап калган. Бирок алган түшүмү былтыркыга салыштырмалуу аз.
“Жылдагыдай эле өрүктөрдүн астына көңдөрдү салып, дары-дармектерди берип карадык. Былтыркы жылга караганда бир аз суюгураак болду. Бирок азыр бардыгы жакшы. Мүмкүнчүлүктөргө карабай мөмөсүн алып берди”, - деди ал.
Жыргалбек өрүктү Баткендеги базарга алып барып сатат. Анын айтымында, ошол жерден тажик жана өзбек соодагерлери сатып алып өрүктү Москвага чейин алып кетет.
Багбандын өрүк багы 20 сотых. Ал эми ар сезондо алган пайдасы 50 миң сомго чейин жетет.
“Өрүктөн түшкөн пайда 40-50 миң сомго чейин болуп калат. Аны күнүмдүк турмушка эле керектейбиз”, - дейт Жыргалбек.
“Биздин айылдын бардыгында эле өрүк жакшы болду. Бирок башка айылдарда өрүк болбой калды”, - деп бөлүштү багбан.
Сүрөттөрдүн автору: Жыргалбек Абдижалил уулу