Индиянын премьер-министри Нарендра Моди Кыргызстанга Борбордук Азия өлкөлөрүнө болгон сапарынын алкагында келип кетти. Ал жогорку кызматтардагы жергиликтүү чиновниктер менен жолугуп, телемедициналык борбордун ачылышына катышып, Кыргызстан менен аскердик жана экономикалык кызматташуу боюнча макулдашты.
Бул Индиянын премьер-министринин 20 жылдан берки Кыргызстанга болгон алгачкы сапары болду. Нарендра Моди Индия өкмөт башчылыгына 2014-жылдын майында дайындалган.
Тышкы иштер министрлигинин Азия жана Африка боюнча департаментинин башчысы Жээнбек Кулубаевдин айтымында, Индиянын премьер-министринин сапары акыркы жыл ичинде даярдалган.
Нарендра Моди Кыргызстандын президенти Алмазбек Атамбаев менен болгон жолугушуусунда Бириккен Улуттар уюмун реформалоо боюнча өз планын тууралуу айтып берди — жергиликтүү ЖМКлар кыргыз өлкө башчысы индиялык премьердин сунушун колдогондугун жазып чыгышты.
Атамбаев менен болгон жолугушуудан кийин эки өлкөнүн коргоо, маданият жана экономика министрликтеринин башчылары жогору айтылган тармактар боюнча кызматташуу тууралуу келишимдерге кол коюшту. Андан сырткары шайлоолорду өткөрүү маалындагы кызматташуу жана көмөктөшүү тууралуу келишимге Кыргызстан менен Индиянын Борбордук шайлоо комиссияларынын башчылары кол коюшту.
Кыргызстандын өкмөтүнүн басма сөз кызматы билдиргендей, кыргыз премьер-министри Темир Сариев менен болгон жолугушуусунда экономикалык маселелер талкууланган.
«Кыргызстан эгемендикти алгандан бери эки өлкө ортосунда экономикалык карым-катнаш өнүгүп келе жатат. Бирок бул соода-экономикалык байланыштын көлөмү бизди канааттандырбайт. Эки өлкө ортосундагы товар жүгүртүүнүн көлөмү 40 миллион доллар болсо, муну 200 миллион долларга жеткирүүгө потенциал бар», — деп билдирген Сариев.
Сүйлөшүүлөрдөн кийин өкмөт башчылары жаңы телемедициналык борбордун ачылышында болушту — ал кыргыз жана индиялык медиктерге өз ара кеңешмелерди өткөрүү мүмкүнчүлүгүн бере турган долбоор.
«Ошондой эле долбоордун алкагында Кыргыз Республикасынын
сактоо уюмдарынын медициналык кызматкерлери үчүн аралыктан окутуу курстарын өткөрүү каралууда», — деп билдирди кыргыз өкмөтүнүн басма сөз кызматы.
Андан соң Моди Индиянын рухий лидери жана 20-кылымдын биринчи жарымында өлкөнүн Улуу Британиядан көз карандысыз болушу үчүн күрөштүн башында турган Махатма Гандинин айкелинин ачылышына катышты.
Нарендра Моди Кыргызстанга Орто Азия өлкөлөрүнө болгон сапарынын алкагында келип кетти.