17-июль күнү эртең менен Бишкектеги Эски аянтта Айт намазы окулду — ыйык Рамазан айынын аякташына арналган майрамдык намазга Кыргызстандын 10 миңден ашык мусулманы келди.
Иш-чаранын расмий башталышы 6:15ке пландалган — ал мезгилге карата Эски аянтка кыйла эле көп сандагы адамдар топтолуп калган.
Аянтка кире бериш жерлерде милиция келгендердин кээ бирлерин текшерип жатты, курал-жарак жана кооптуу заттардын бар-жоктугун текшерүү үчүн сумкаларды карашты.
Дин кызматчылары сүйлөп бүткөн соң сөздү парламент төрагасы Асылбек Жээнбеков алды — ал чогулгандарга президент Алмазбек Атамбаевдин жана жалпы парламенттин куттуктоосун окуп берди.
Намаз башталганга жакын күн кыйла бийик көтөрүлүп калды — Бишкекте абанын температурасы болжол менен 30 градуска чейин жетти.
Намазга келгендердин бири эс-учун жоготту, милиционерлер менен дарыгерлер жардам көрсөтүү үчүн аны аянттан алып кетишти.
Салттуу түрдө намаздын башында Кыргызстандын муфтийи Максатбек ажы Токтомушев турду. Намаз аяктагандан кийин чогулгандар бири-бирин майрам менен куттукташты.
Келгендердин көбү намаз аяктагандан көп өтпөй эле аянттан кетишкени менен кээ бирлери ошол жерде эле эс алууга киришишти.
Сүрөт жана текст: Дмитрий Мотинов