Белгисиз адамдар аларды Бишкектеги «Ала-Тоо» амфитеатрынын ичине киргизбей коюшкандан кийин имаратты көздөй таштарды ыргытышты. Анда аралаш стилдеги мушташ өнөрү боюнча MMA JFC чемпионаты мелдештер өтүп жаткан.
Болжол менен саат 20:00дөрдө мушташтар өтүп жаткан амфитеарга кире албай калгандар имаратты көздөй таштарды ыргытышты. «Ала-Тоонун» ичиндеги көрүүчүлөр ыргытылган таштардан коргонуу үчүн баштарын отургучтар менен калкалашты.
«Ала-Тоодо» аралаш стилдеги мушташ өнөрү боюнча ММА JFC мелдештери өтүп жаткан. Анда башкы мушташ америкалык мушкер Джефф Монсон менен кыргыз депутаты Замирбек Сыргабаевдин беттешүүсү болду.
«Сырттан таштарды ыргытып башташты, күзөтчүлөр ошол тарапка чуркап кетишти. Көрүүчүлөр болсо баштарын отургучтар менен калкалашты. Анан көп өтпөй баары тынчыды. Аларды таркатышты окшойт», — деп билдирди Kloop.kgнин амфитеатрда жүргөн кабарчысы Дмитрий Мотинов.
Kloop.kgнин «Ала-Тоонун» сыртында жүргөн кабарчысы Виталий Белошапкин амфитеатрдын сыртындагы адамдар билеттеринин бар экенине карабастан мелдешке кире албай калгандыктарына нааразы болуп жаткандыктарын билдирди.
«Мында Кыргызстан-Австралия беттешиндегидей абал болууда. Имараттын ичине билеттери жок көп кишилерди киргизип жиберишип, билеттери барлар кире албай калышкан. Бир саат мурун ызы-чуу болушуп, таштарды ыргытышкан, бирок милиция келип баары тынчыды», — деди ал.
Кабарчынын айтымында, сыртта тургандардын жарымына жакыны амфитеатрдын ичине кире алышкан, а калгандарын милиция сүрүп чыккан.
Бишкектин укук коргоо органындагы булак Kloop.kgге учурда ал жакта Октябрь РИИБсинин кызматкерлери бар экенин жана абал «нормалдуу» экенин айтты.
Видео: Монсон менен Сыргабаевдин беттеш алдындагы таразага түшүүсү:
