Илбирстерди изилдөөчүлөр Чүй облусундагы Чоң-Кемин улуттук паркына жашыруун камераларды орнотушуп, андагы илбирстерди бир нече жолу сүрөткө түшүрүшкөн. Ал сүрөттөр өтө жакын аралыктарда тартылган.
Улуттук паркка атайын камераларды жергиликтүү токой чарба кызматкерлери коюшкан — жабдуулар менен иштөөнүн негиздерине аларды «Snow Leopard Trust» программасынын аймактык директору Кубан Жумабай уулу үйрөткөн. Сүрөттөр программанын snowleopard.org сайтына жарыяланган.
