20-декабрда кыргыз рэп ырчылары Баястан, Бегиш жана Каспер Бишкектеги Спорт ордосунда «ZAMANBAP» аталышындагы дебюттук альбомунун бетачарын жасашты.
Zamanbap чыгармачыл бирикмесинин рэпперлеринин Спорт ордосундагы концертине эки миңге жакын киши катышты.
Анда ырчылар тарыхтагы алгачкы кыргыз тилдүү рэп-альбом болгон «ZAMANBAP» жаңы пластинкасындагы бардык 11 тректи тең аткарышты.
Баястан Ботоканов (рэппер Баястан) Kloop.kgге курган маегинде дебюттук пластинканы даярдоого дээрлик эки жыл, а жаздырууга бир жарым ай убакыт талап кылынганын айтты.
«Альбомдун башкы артыкчылыгы анын баарынын кыргыз тилинде болгондугунда, а андагы ырлардын мазмуну сабак болорлук мүнөзгө ээ», — деди бирикменин продюсери Мирлан Саткымбаев.
Zamanbap менен бирге сахнага кыргыз эстрадасынын жылдыздары Мирбек Атабеков, Арсен, Омар, Назгүл Токтакунова жана Чолпонай чыгышып, өз чыгармаларын аткарышты — алардын баары тең альбомду жазууга конок катары катышышкан.
Zamanbapтагы ырлардан сырткары сахнада Троеразный жана Ауцайдер топторунун тректери аткарылып, «Жарайт Сити» скетч-шоусунун башкы ролдорунун аткаруучулары тарабынан кичи-комедиялык шоу көрсөтүлдү.
«ZAMANBAP» альбомунун чыга тургандыгы жөнүндө 2015-жылдын июнунда эле белгилүү болгон — анда Баястан, Бегиш жана Каспер дебюттук пластинканын эки мүнөттүк тизерин чыгарышкан.
Баястан менен Бегиш хип-хоп жанрында 2010-жылдын башынан бери ырдап келишет, андан бери алар көбүнчө түштүк америкалык штаттардагы хип-хопко окшогон музыканын коштоосундагы кыргыз тилдүү рэпти өнүктүрүү аракетинде.
Автор: Зияра Асылбекова.
Сүрөттүн автору: Айдана Канатбек.