Бишкекте бир ай мурда ачылган Владимир чиркөөсүндө православдардын башкы майрамдарынын бири болгон Рождествого арналган алгачкы сыйынуу болуп өттү.
Бишкектеги православдар 6-январь күнү кечинде Рождествону майрамдоого арналган Владимир чиркөөсүндөгү сыйынууга чогулушту.
Рождество — Иса пайгамбардын туулган күнүнө карата белгиленген христиандардын башкы майрамдарынын бири.
Орус проваслав чиркөөсү аны 7-январда («эски стиль» — Юлиан жылсанагы боюнча 25-декабрь) белгилейт.
Рим-католик чиркөөсү менен протестанттык чиркөөлөрдүн көпчүлүгү Рождествону азыркы — Григориан жылсанагы боюнча 25-декабрда майрамдашат.
Бишкектеги жаңы Владимир чиркөөсү 10-декабрда ачылган. Ага чейин ал 20 жыл бою чиркөөгө келгендердин кайыр-садага таштаган акчаларына курулуп келген.
Чиркөөгө 988-жылы православ христиан динин орустардын мамлекеттик дини катары тандаган князь Владимирдин аты ыйгарылган.
Рождество кызматын Бишкектин жана Кыргызстандын Епархиясынын епискобу Даниил жүргүздү.
