Үч күнгө созулган көчмө сүрөт көргөзмөсүнө 100дүн тегерегинде эмгек коюлган. Мунун өзгөчөлүктөрүнүн бири — сүрөттөрдүн баары эле боёк менен тартылган эмес.
Бишкектеги “Вефа” соода борборунда 22-январдан 24үнө чейин Жаш сүрөтчүлөр бирикмесинин мүчөлөрүнүн эмгектеринин көргөзмөсү ачылды.
Буга чейин ушул эле көргөзмө “Бишкек парк” соода борборунда январь айынын башында коюлган болчу.
Өзгөчөлүктөрүнүн бири — бул сайма менен түшүрүлгөн портреттер. Белгилүү саясатчылар, коомдук ишмерлер, спортчулар, эстрада жылдыздары сайма менен түшүрүлгөн 15 портрет бар.
Көргөзмө кайсы бир темага багытталган эмес жана ар кайсы жанрдагы эмгектерди көрүүгө болот.
Жаш сүрөтчүлөр бирикмесинин төрагасы Замир Илипов көчмө сүрөт көргөзмөсү соода борборунда өткөрүлүп жаткандыгын элдин мындай жайларга көп келе тургандыгы менен түшүндүрдү.
“Эл музейге көп барбай калды. Ага караганда соода борборлоруна элдин келип жүргөнү байкалат. Жакшы максаттарыбыз ишке ашып кетет деп ойлойбуз”, — деп билдирди Илипов.
Илиповдун кошумчалашынча, бул сатыкка коюлган сүрөт көргөзмөсү болгондуктан ар ким өзүнө жаккан сүрөттү сатып алса болот.
Авторлор: Майрамкүл Жанарбек кызы жана Даниил Рустам уулу