Бишкекте троллейбус кыймылынын токтошуна электр линияларындагы авария себеп болду. Кыймыл бузулган жерлер оңдолоору менен дароо калыбына келтирилет.
Бишкектеги троллейбус кыймылы 11-февралда түштө токтоду.
Ага электр линияарындагы авария себеп болду, деп билдирди Kloop.kgге Бишкек троллейбус башкармалыгынын директорунун орун басары Мурат Үмөтов.
«Адистер авариянын себептерин аныктап жатышат», — деди ал.
Үмөтовдун айтымында, троллейбус кыймылы бузулган жерлер оңдолоору менен дароо калыбына келтирилет.
«Бузулган жерлер оңдолуп бүткөрүлгөндөн кийин дароо жүрөбүз», — деди ал.
Бул электр линияларындагы мүчүлүштүктөрдөн улам троллейбус кыймылы токтогон алгачкы учур эмес. 2015-жылдын ноябрында троллейбустар Чүй жана Манас проспектилеринин кесилишинде токтоп калышкан.
Азыркы учурда Бишкек троллейбус башкармалыгында 660 жумушчу жана 9 каттам боюнча иштеген 154 троллейбус бар.
Автор: Анастасия Стрельникова