Ош облусундагы Шамшидин Хожиматовдун үй-бүлөлүк цирк труппасы 20 жылдан бери өз оюн-зооктору менен Кыргызстандын түштүгүндөгү жашоочуларды кубандырып келет. Эл арасында Алимжан Палван деп аталып калган артисттин өзү цирк өнөрү менен 45 жылдан бери алектенет.
Алижан Палвандын цирк труппасынын оюн-зоогуна билеттер сатылбайт — көрүүчүлөр артисттерге «жүрөктөн чыккан» акчаларын беришет. А акча берүүгө мүмкүнчүлүгү жоктор аларды бекер көрө алышат.
Хожиматовдун труппасы артисттин алты кыздан кийин төрөлгөн жалгыз уулунун урматына «Лочин» деген аталышка ээ болгон.
Шамшидин Хожиматов аркан жолдо басуу боюнча Ташкентте он жыл окуган — ал жакка ал онунчу классты аяктаары менен кетип калган. Кыргызстанга кайтып келгенден кийин артист 20 жыл Ош мэриясынын Маданият департаментинде иштеген — ал жылдар аралыгында Хожиматов Казакстан, Украинада жана Орусиянын түрдүү аймактарында өнөрүн көрсөтүүгө жетишкен.
Хожиматовдун үй-бүлөсү өз акчасына сатып алган автобус аларга 25 жылдан бери кызмат кылып келет. Артисттер кышында да жумушсуз отурбайт — февралда алар Ош облусунун Араван шаарына оюн-зоок койгону келишкен.
«Бизди тойлорго көп чакырышат. Жакында эле тоолуу Кожокелен айылындагы тойго барып, өз өнөрлөрүбүздү көрсөтүп келдик. Чек-Абад айылына да чакырышкан — ал жакта да оюн-зоок көрсөттүк. Түшкө чейин биз аркан жолдорду орнотобуз, андан кийин жарнама үчүн бир нече номур көрсөтөбүз, а эртеси болсо толук номурларыбызды аткарабыз» — дейт Алижан Палван.
Ал башка өнөрлөр сыяктуу эле цирк өнөрүндө да кыйынчылыктар көп экенин, бирок аны таштоо таптакыр оюна келбегендигин айтты. Артисттин балдары менен неберелеринин айрымдары анын жолун жолдошкон, ага ал абдан кубанычта.
«Жаш кезимде мен аркан жолдо басчумун. Азыр 60тан аштым — карыдым. Азыр аркан жолдо балдарым басышат. Мында неберелеримдин дээрлик бардыгы тең катышышат. Мисалы, үч жаштагы неберем дагы аркан жолдо басат», — дейт Хожиматов.
Алижан Палван коопсуздуктун болушу — анын үй-бүлөлүк труппасындагы милдеттүү шарт экенин айтат.
«Адамдардын көңүлүн ачуу үчүн [дарчылардан сырткары] маскарапоздор чыгышат, андан кийин балбан инилерим тараза таштарын көтөрүшөт. Жалпысынан оюн-зоок бир жарым, эки саатка чейин созулат».
Текст: Мурат Асан
Видео жана сүрөт: Дастан Үмөттегин