Ысык-Көл облусунун Тасма айылында жашаган дыйкан Бейшенбай Сааданбаев үйүндөгү электр жарыгынын тез-тез өчүрүлүшү көйгөйүн чечүүнүн жолун тапты — ал үчүн дыйкан шамалдын энергиясын пайдалана баштаган.
Сааданбаев шамал-генераторун 2015-жылдын жайында чогултуп бүткөн — ал үчүн техникалык билими жок, өмүр бою жер иштетүү менен алектенген айыл тургунуна үч айга жакын убакыт талап кылынган.
Анын айтымында, мурда Тасмада күн сайын электр энергиясын өчүрүп келишкен — бул айылдыктарга көптөгөн ыңгайсыздыктарды жаратчу. Өз кезегинде ал айылдык ойлоп табуучуда шамал-генераторун чогултуу идеясынын жаралышына түрткү болгон.
Сааданбаев бул шамал менен иштеген кичи-электр станциясын иштеп чыгууга көп деле чыгым болбогондугун, бирок аны чогултуу маалында кыйынчылыктар болгонун айтты.
«Башында жөн гана кызыгып чогулткам. Кийин баары даяр болгон соң тегеренүүсү жетпей калып жатты. Анан аккумулятор кошуп, аны генератор менен тутуштырдым — иштеп баштады. Бирок анда азкыркыга чейин иштеп чыгуу керек болгон жерлери бар», — деди фермер.
Убакыттын өтүшү менен Тасмада электр энергиясы көп өчүрүлбөй, шамал-генераторлору анда анчалык зарыл болбой калган — эми Сааданбаев бул сыяктуу генераторлорду таптакыр электр жарыгы жок жерлерге орнотууга каражат издеп жатат.
«Менин келечекке койгон планым — мындай техниканы электр жарыгы жок жерге орнотуу. Мисалы, жайлоолордо, тоо базаларында», — деди айылдык ойлоп табуучу.
Сааданбаев Kloop.kgнин кабарчысына билдиргендей, ал кичинекей кезинен бери эле техникага кызыгат, а Советтер Союзу тарагандан кийин эксперимент жүргүзүп, түрдүү механизмдерди чогултуп баштаган.
Анын алгачкы эмгеги эгин басуучу машина болгон — айыл тургундары аны азыркыга чейин пайдаланып келишет.
Сүрөт жана видео: Айгерим Кубатбекова
Текст: Нуржанат Советбек кызы
