Кыргызстан менен Казакстандын дизайнерлери 3-мартта «Жаз-Жай-2016» коллекциясын көрсөтүштү. Тизеден ылдый юбкалар, романтикалуу тордолгон кийимдер жана «сафари» — иш-чаранын катышуучулары быйыл саркеч кийинген бишкектиктерге дагы эмнелер сунушталары тууралуу айтып беришти.
Казак модельери Леонид Жеребцовдун айтымында, 2016-жылдын жазгы-жайкы сезонундагы көчө модасында узун жана өзгөчөлүктөргө ээ көйнөктөрдү кийүүгө болот.
«Мен зыгырдан, жынсыдан жана чыттан тигилген көйнөктөргө көңүл бурууну сунуштайм. «Сафари» стилинде тигилген үлгүлөрү трендде. Бул сезондо түз силуэттеги көйнөктөрдү кийүү стилдүү — жөнөкөй формалар модада. Артыкчылыктуу узундук – тизеден ылдый, тизеге чейин, ошондой эле мини жана макси көйнөктөр. Белгилүү бир узундукка карабастан турпатынын жакшы жагын көрсөтүү маанилүү», — деген кеңешин берди Жеребцов.
Дизайнер Борбордук Азиядагы адамдардын кечелерге ылайыкталган кийимдерди жакшы көргөндүктөрүнө карабастан стилде гламурду күн сайын керек болчу спорттук жана casual кийимдер менен айкалыштыруу керектигин кошумчалады.
Өзүнүн «DASHA» брэндинин коллекциясын көрсөткөн кыргыз дизайнери Дарья Батырканова кийим кийүүдө жаштарды кайраттуураак болууга чакырды.
«Бул сезондун үлгүлөрүндө эффективдүү көрүнгөн жасалгалоолорду көрүүгө болот — анда образ кыйла назик жана романтикалуу болуп калат», — деди Батырканова.
Анын айтымында, быйылкы сезондо романтикалуу тордолгон нерселер актуалдуу — ал юбкаларда, ошондой эле кофталарда да болушу мүмкүн. 
KOLIBRI брендинин өкүлдөрү болгон дизайнерлер Бегайым Осмонова менен Бермет Кадыркулова Бишкектин саркеч тургундарына жазы далылуу жакеттерди сунушташты. Өзүнүн жеңил экендигине карабастан алар кечки салкындыктан сөзсүз сактайт.
Иш-чаранын уюштуруучусу, «Модный дом» шоу-румунун өкүлү Алтынай Рыскулова Бишкектин саркеч жашоочулары Түркия менен Кытайдан алынып келинип жаткан кийимдерге караганда жеткиликтүүрөөк жана эксклюзивдүүрөөк болгон жергиликтүү дизайнерлердин эмгектерине көңүл буруусу керек деп эсептейт.
