Uphill форматындагы алгачкы жолу тоодогу жарыш Бишкектин четинде өттү. Кыргызстан менен Казакстандан барган жүздөн ашык катышуучу түрдүү сынактарга катышышып, өздөрүнүн чыдамкайлыктарын текшеришти.
2-апрель күнү Uphill мелдештеринин алкагында жүздөн ашык киши «Кара-Булак» эко-комлексинин аймагында тоого 400 метр чуркашты.
Жамгырлуу аба ырайына карабастан катышуучулар өткөргөн убактыларына өкүнүшкөн жок. Алардын көбү андай аба ырайынын артыкчылыктуу экенин айтышып, бул сыяктуу мелдештер дал ушундай шартта өтүшү керектигин белгилешти.
Мелдештердин уюштуруучуларынын бири Кирилл Бевзюк Кыргызстанда Uphill мелдештери биринчи жолу өткөрүлүп жатканын айтты. Иш-чаранын максаты — өлкөдөгү туризмдин деңгээлин көтөрүү жана адамдарды спортко тартуу.
«Мен аз убакыт аралыгында эле ушунчалык катышуучулар менен көрүүчүлөрдү чогулта алганыбызга кубанычтамын. Кайсыл жерде өткөрсөк деп көпкө тандадык, анткени ар бир эле тоо төрт жүз метрде болбойт да», — деди ал.
Жарыштын катышуучуларынын эң кичүүсү Александр Стасевич 11 жашта.
«Чуркоонун жардамы менен Кыргызстан мындан да саламаттыгы жакшы улут болот», — деди ал.
Жеңүүчүлөргө медалдар жана белек катары сертификаттар тапшырылды.
Тоого чуркоодон сырткары андагылар «Кроссфит салгылашуусуна» да катыша алышты.
Төрт кишиден турган сегиз команда уюштуруучулардын тапшырмаларын аткарышты. Аларга бири-бирин ийнине көтөрүп, чоң устундар менен жарышып, дөңгөлөктөрдү оодарып, аркан менен жогору чыгууга туура келди.
Видео: Даниил Ляпичев
Монтаж: Азат Рузиев
Сүрөт: Уулжан Саякбаева