Бишкектин башкы планында 2025-жылга чейин шаарда жер үстүндөгү метро куруу каралган — бул тууралуу Бишкек башкы архитектуранын өкүлү билдирди.
27-апрелде башкы архитектор Бактыбек Абдиев Бишкекте жер үстүндөгү метро пайда болушу мүмкүндүгүн билдирди. Анын айтымында, анын курулушу шаардын башкы планында жазылган жана 2025-жылга чейин башталат.
«Биз жер алдындагы метрону пландабай элебиз. Бизде жер үстүндөгү метронун бир нече долбоору бар», — деди Абдиев.
Башкы архитектордун орун басары Аскат Түлөбердиев пландардын бирине ылайык, жер үстүндөгү метро түштүк кичи райондорунан башталып, Бишкектин түндүк бөлүгүн көздөй кете тургандыгын кошумчалады.
«Шаарды өнүктүрүүнүн 2025-жылга чейинки башкы планында монорелстүү жолдун курулушу каралган», — деди ал.
Архитекторлордун айтымдарында, метро жолу Ибраимов көчөсү аркылуу өтөт.
Бишкектин башкы планынын авторлорунун бири Сергей Дресвянников «Енот» басылмасына курган 2014-жылдагы маегинде жер үстүнө метро курууга 500 млн. доллардан ашык каражат керектелиши мүмкүндүгүн билдирген.
Анын айтымында, курулуш иштери 2018-жылы башталышы керек. Бирок ал метро курууга шаарда акча жок экенин мойнуна алды.
«Эң кыйыны — бул ишти ордунан жылдыруу. Бул ошондой эле чоң каражат маселеси — Бишкек үчүн бул абдан оор болот», — деди Дресвянников.
Жер үстүндөгү метро куруу 2007-жылы жактырылган Бишкектин башкы планына киргизилген. Бирок андан бери метронун курулуш процесси пландан ары жыла элек.