11-июнда Бишкектен күндүн айланасындагы асан-үсөн шакекчесин байкоого мүмкүн болду. Астрономдор анын түндүк жаркырагы сыяктуу «гало» деген аталыштагы кубулуш экенин билдиришүүдө.
11-июнь күнү күндүз Бишкекте күндүн айланасындагы асан-үсөн шакекчелери байкалды. Социалдык түйүн колдонуучулары Кыргызстан үчүн адаттан тыш болгон кубулуштун сүрөттөрүн жарыялап башташты.
Астроном Вячеслав Плужников Kloop.kgге күндүн айланасында пайда болгон шакекче гало деп аталарын билдирди. Айтымында, анын пайда болушуна атмосферада суунун көп буулануусу себеп болот.
«Атмосферада суу буусу кыйла көп бууланганда ал кристаллдарга айланат, андан соң галону пайда кылат», — деди ал.
Астрономия мугалими Александра Шумейктин айтымында, бул кубулуш аномалдуу болуп эсептелбейт. Ал Kloop.kgге курган маегинде галонун пайда болушу аба ырайынын өзгөрүүсүн билдирбей тургандыгын айтты.
«Бул көрүнүш түндүк жаркырагы сыяктуу, аны күндүз да, түнчүндө да жылдын бардык мезгилдеринде байкоого болот. Суук мезгилдерде мындай шакекчелерди кол чырактарынын же лампалардын тегерегинен көрүүгө болот», — деди ал.
Шумейк гало кадимки асан-үсөндөн суудан эмес, а кристаллдардан пайда болгондугу менен айырмалана тургандыгын кошумчалады.
«Муз кристаллдары айланып, төмөн түшүп жана өз формасын өзгөртө алат. Эгер асан-үсөндө кызыл түс сырткы тарабында болсо, галодо ал борборуна жакыныраак жайгашкан. Галонун түсү күчтүү эмес, анда кызыл жана кызгылт сары гана түстөр бар, а асан-үсөндө бардык түстөрдү табууга болот. Асан-үсөндү артыңды күнгө каратып байкоого болот, а галону күндүн жанынан гана байкоого болот», — деди ал.