«Семетей» балдар бакчасынын ачылышына Оштун мэрин жана биринчи вице-премьер-министрди курдаштары менен күтүп жаткан 9-класстын окуучусу эси ооп кулап түштү.
Кыргызстандын эгемендүүлүгүнүн 25 жылдыгына карата Ош шаарынын Озгур айылында балдар бакчасынын ачылышы болуп жатканда 9-класстын окуучусу эсин жоготуп жыгылып түшкөн.
Окуучу өз классташтары менен бирге Оштун мэри Айтмамат Кадырбаевди жана биринчи вице-премьер-министр Мухаммедкалый Абылгазиевди күтүп жатканда эсин жоготкон.
Kloop.kgнин кабарчысы Дастан Үмөттегиндин билдиришинче, чиновниктер балдар бакчанын ачылышына бир саат кеч келишкен.
«Семетей» балдар бакчасынын жетекчиси Айсалкын Осмонкулованын айтымында, окуучу кыз «күндүн ысыгынан» эсин жоготкон. «Кыздын абалы стабилдүү. Ал күндө көп туруп калып эсин жоготкон», — деген ал.
Окуучунун абалы белгисиз — аны дароо балдар бакчасынын имаратына алып кирип кетишкен.
Окуучу кыздар ачылышка эртең мененки саат 6:30да келгенин, ал эми ачылыш болсо саат 8:00де башталышы керек экенин айтышкан. Кийин ачылышты бир саатка жылдырып коюшкан.
Бир жыл мурда Ошто «Өчпөс от» мемориалдык комплексинин ачылыш аземинде да окуучулардын бири эсин жоготкон. Анда алар премьер-министр Темир Сариевди күтүп жатышкан болчу.
Сүрөт: Дастан Үмөттегин