Кыргызстандын бардык аймактарындай эле Ошто да 31-август Эгемендүүлүк күнү белгиленди. Kloop.kgнин кабарчысы Дастан Үмөттегин 5000 киши чогулган борбордук аянтка барып, шаардыктар бул күндү кандай тосуп алганын сүрөткө тартып келди.
Расмий салтанат СССРдин курамындагы Кыргызстандын биринчи жетекчиси Абдыкадыр Орозбаковдун эстелигине гүл коюу менен башталды.
Андан соң биринчи вице-премьер-министр Мухаммедкалый Абылгазиев жана жергиликтүү бийлик өкүлдөрү аянтка чогулгандарды майрамы менен куттуктады.
Оштун мэри Айтмамат Кадырбаев өзүнүн куттуктоо сөзүндө көз карандысыздыктын маанисин белгилеп, кыргызстандыктарга тынчтык каалады.
«Ош — кыргыздардын тарыхый борбору, ар жылы шаар өнүгүүдө. Алдыда эркин, тынч, ынтымак жашоо үчүн бардык күч жумшалат», — деп убадалады ал.
Кийин аянтта аскердик парад өтүп, Кыргызстандын тарыхындагы негизги окуяларды чагылдырган театралдаштырылган көрсөтүү болду.
