Президент Алмазбек Атамбаев Чолпон-Ата шаарындагы мамлекеттик резиденцияда басма сөз жыйынын өткөрдү. Жыйында президенттин айткандарын кыскача баяндайбыз.
Атамбаевдин басма сөз жыйында сүйлөгөн эң маанилүү сөздөрү:
Жогорку Нарын ГЭСи боюнча Орусия менен кызматташуудан баш тартуу «туура» болду. Эгерде Liglass Trading CZ чех компаниясы Кыргызстандын «РусГидро» компаниясынын алдындагы $37 млн карызын жаппаса, анда башка инвесторлорду издейбиз.
___________________
Шайлоонун жыйынтыгын, кандай чыкса да, кабыл алам. Премьер-министр Сооронбай Жээнбеков — КСДПдан шайлоого аттанган жалгыз талапкер, ал эми парламент спикери Чыныбай Турсунбеков бул чечимге макул болбосо, партиядан чыгышы керек.
___________________
Эгерде Жээнбеков болбогондо, мурдагы премьер-министр Өмүрбек Бабановду колдомокмун. Бийликти тынчтык жолу менен өткөрүп берүүнү убадалайм.
___________________
Кыргызстандын түштүгүнө Орусиянын аскердик базасын жайгаштыруудан коркпойм, анткени Орусия «Кыргызстандын жерине кызыкдар эмес». Бирок, акыры-аягы базаны жайгаштырабы-жокпу алар өздөрү чечишет, анткени бул «аябай чоң акча».
___________________
«Занозага» каршы доо арыздарды кайтарып албайм, анткени алар «жалакорлор». «Заноза» менен соттук териштирүүлөрдөн тынчтык жолу менен чыгуу жолун көргөн жокмун, анткени «сабак бергим келет».
___________________
Согушка барып, кудай үчүн өлтүргөндөр — Куранды окубаган, араб тилин билбеген «кеңгирегендер». Диний билим берүү — эң башкысы.
___________________
«Белизгейт» жөнүндө унута элекмин, бул иш боюнча маалымат алып турам. Эгерде документтер далилденбесе, УКМКнын башчысы Абдил Сегизбаев жооп берет.
___________________
Президенттиктен кийин мен эч кандай кызматты ээлебейм. Кызматтарга менин аллергиям бар, бирок мен болочоктогу президент менен жаңы жетекчиликке жардам бергенге даярмын.
___________________
Айрым «НПОчулар» менен саясатчыларды жактырбайм. Колумдан келсе, аларды ким каржыласа ошол өлкөлөргө учак менен жөнөтмөкмүн.
___________________
Ишкердик үчүн шарттарды түздүк. Кыргызстан бизнес үчүн бейиш болушун, өлкөдө көптөгөн бай ишкерлер болушу каалайм.
___________________
Кыргызстандын кулатылган президенти Аскар Акаевди кечирбейм.
___________________
2017-жылга чейин Улуттук өнүгүү стартегиясы толугу менен ишке ашпай калганында коркунуч жок. Азыр жаңысы даярдалып жатат, анын үстүнөн эксперттер иштеп жатышат.
___________________
Кытайдан келген темир жол Кыргызстан аркылуу өтүшү керек, болбосо анын бизге кереги жок. Биз жаңы долбоор жасадык, Кытай менен Өзбекстан бизди түшүнүштү окшойт.
___________________
Кыргыз «Моссадынын» жок экени өкүнүчтүү, болбосо Жаныш Бакиевди таап жазасын беришмек.