Жалал-Абад шаарынын борбордук базарында 12синен 13-апрелге караган түнү өрт чыгып, беш сааттын ичинде өчүрүлдү. Тилсиз жоодон адам өмүрүнө зыян келген эмес, материалдык чыгым такталууда.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-1-1.jpg)
Өзгөчө кырдаалдар министрлигинин Жалал-Абад облусундагы башкармалыгын башчысы Абдишарип Бекилов «Клоопко» билдиргендей, базарда чыккан өрттү өчүрүүгө алты бригада тартылган.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-10-1.jpg)
«Жалал-Абад шаарынын борбордук базарында өрт чыкканы тууралуу маалымат түнкү саат 02:00лер чамасында келип түштү. Тилсиз жоо таңкы саат 06:27де чектөөгө алынды», — деди Бекилов.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-11-1.jpg)
ӨКМдин маалыматына ылайык, кырсыктан жабыркагандар жок жана материалдык чыгымдар такталууда.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-6-1.jpg)
Буга чейин 10-апрелде Жалал-Абад шаарынын борбордук базарында өрт коопсуздугун алын алуу боюнча машыгуу өткөрүлгөн. ӨКМден кабарлашкандай, базардагы өрт коопсуздугунун сакталышына «канааттандырарлык» деп баа берилгени менен өрт өчүрүүчү техника базардын ичине кире алган эмес.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-3-1.jpg)
«Соода-түйүндөрүн иретке келтирүү боюнча тапшырма берилген. Анткени, өрт өчүрүүчү машина базарга кире алган эмес. Андан сырткары, Жалал-Абад шаарынын борбордун базарында гидранттар жана суу көлмөлөрү жок болуп чыккан», — деди Бекилов.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-9-1.jpg)
Бекилов кошумчалагандай, аныкталган мүчүлүштүктөрдү оңдоп-түзөөгө базар жетекчилигине он күн убакыт берилген.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-16-1.jpg)
Жалал-Абад шаарынын борбордук базарынын жетекчиси Канатбек Усенов өрт эскилиги жеткен электр чубалгыларынан улам чыккан болушу мүмкүн деген божомолун «Клоопко» айтты.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-2-1.jpg)
«Негизинен биздин борбордук базарга электр чубалгылары СССР маалында тартылган бойдон жаңыланган эмес. Менин жеке пикирим боюнча өрттүн чыгуу себептери да дал ушуга байланыштуу», — деди Усенов.
![](https://ky.kloop.asia/wp-content/uploads/sites/6/2018/04/Jalal-Abad-Bazar-Ort-2018-4-1.jpg)