Парламентарий Насыр Мусаев депутаттык ыйгарым укуктардан баш тартты. Мусаев Жогорку Кеңеште «Кыргызстан» фракциясынан депутат болуп иштеген.
Боршайкомдун басма сөз кызматынан «Клоопко» кабарлашкандай, комиссиянын мүчөлөрү Мусаевдин мандатын тапшыруу жөнүндө кайрылуусун эртең, 6-сентябрда карашат.
«Кыргызстан» фракциясынын лидери Алмазбек Баатырбеков 24.kg маалымат агенттигине маалымдагандай, Мусаев ден соолугунун абалына байланыштуу депутаттык ыйгарым укуктарынан баш тартууну чечкен.
«Ал [парламенттин жыйындарын] көп калтырчу, мартта фракция Мусаевди мандаттан ажыратуу жөнүндө маселени чечип берүүнү суранып тармактык комитетке кайрылган», — деди Баатырбеков.
Эл өкүлдөрү Мусаевди депутаттык макамдан ажыратуу маселесин апрель айында эле караган болчу. Бирок ал учурда депутаттар бир пикирге келе албай калышкан.
Насыр Мусаев 2018-жылдын апрель айында ант берип, депутаттык кызматка киришкен. «Кыргызстан» фракциясынын катчылыгынын жетекчиси Аманкул Токтогулов билдиргендей, ошол убактан бери Мусаев парламенттин бир дагы отурумуна келген эмес.
