Ош милициясы Руслан Матраимовдун арызы боюнча «Клооптун» журналистика мектебинин студентин суракка чакырды. Ал 9-январдагы съемкага басылманын кызматкерлери менен чогуу видео тартканды үйрөнү барган. Журналисттер каралбай калган имаратты тартып жатышкан. Бул имарат бажы башчысынын мурдагы орун басары жана коррупция тууралуу журналисттик иликтөөнүн фигуранты Райымбек Матраимовдун үйүнөн жүздөгөн метр алыстыкта жайгашкан.
Анын иниси Руслан Матраимов ошол эле күнү съемка анын жеке жашоосунун кол тийбестигине шек келтирет деп, милицияга арыз жазып кайрылган.
Ош шаардык ички иштер башкармалыгы буга чейин «Клооптун» айдоочусун, журналистин жана операторун суракка алган. Мындан тышкары, съемка учурунда журналисттер менен чогуу жүргөн редакциянын мурдагы кызматкерин да суракка чакырышкан. Бирок, адвокат кечигип калгандыктан, сурак 13-январдан 14-январга жылдырылган. Ушул эле күнү журналистика мектебинин студенти да сурак берет.
Журналисттер Матраимовдун үйүн тартышкан эмес. Алар даярдалып жаткан материал үчүн ошол эле райондогу каралбай калган имаратты тартышкан жана бул материалдын Матраимовдордун үй-бүлөсү менен эч кандай байланышы жок.
Руслан Матраимов — Матраимовдорго таандык болгон «Исмаил ата» кайрымдуулук фондун жетектейт. Аталган фонд жана Искендер Матраимов, Райымбек Матраимов жана алардын жубайлары «Азаттык», «Клооп» жана 24.kg басылмаларын сотко беришкен.
Тексттик трансляция: