Бишкекте кыргыз саясий ишмери Мукар Чолпонбаевди акыркы сапарга узатуу зыйнаты өттү. Ал 24-майда коронавирустан улам көз жумган. Чолпонбаев көз жумганга чейин Республикалык клиникалык жугуштуу оорулар ооруканасында дарыланып жаткан болчу.
Жогорку Кеңештин экс-спикери менен коштошууга туугандары, достору, кесиптештери, анын ичинде парламенттин спикери Дастан Жумабеков, президенттик аппараттын башчысы Досалы Эсеналиев жана саламаттык сактоо министри Сабиржан Абдикаримов келди.
Мукар Чолпонбаевдин сөөгү Ала-Арча көрүстөнүнө коюлат. Ал жерге каза болгон саясатчылар, коомдук ишмерлер, искусствонун, адабияттын жана илимдин эмгек сиңирген ишмерлери, ошондой эле өлкөнүн баатырлары коюлат.
Парламенттин мурдагы төрагасы коронавирус жуктуруп кайтыш болду деп катталган 15-кыргызстандык болду. Ал ооруканага 5-майда жаткырылган болчу.
Чолпонбаев Советтер Союзу учурунда эле юридикалык билимге ээ болуп, эмгек карьерасын прокуратуранын тергөөчүсү болуп баштаган.
Андан кийин депутат болуп шайланып, бирок бир нече убактан кийин президенттик аппараттын мыйзам чыгаруу, аткаруу жана сот бийликтери, ошондой эле жергиликтүү өз алдынча башкаруу органдары менен эриш-аркак иштөө боюнча бөлүмүнүн башчысы кызматына дайындалган.
Кийинчерээк Чолпонбаев эки жыл бою Юстиция министрлигин жетектеген. Андан соң ал кайрадан парламенттин депутаты болуп, Жогорку Кеңештин төрагасы болуп да эмгектенүүгө үлгүргөн.
Мамлекеттик кызматкердин карьерасын аяктагандан кийин маркум Арабаев атындагы университетте окутуучу болуп иштеп, мындан тышкары, тажрыйбачы да юрист болгон.