Жогорку Кеңештин депутаты Дастан Бекешев келе жаткан шайлоого «Реформа» партиясы менен барат. Бул тууралуу Бекешев твиттеринде билдирди.
Биз жаңы тарых жаратабыз!
⠀
Мы создаём новую историю!
⠀#реформакерек #бизгереформакерек pic.twitter.com/em01bLCJJ5— Дастан Бекешев (@bekeshev) August 17, 2020
«Биз жаңы тарых жаратабыз», — деп жазды Бекешев.
Партиянын өзүнөн билдиришкендей, Бекешевдин кошулуусу менен алар «күчтүүрөөк болуп калды».
https://twitter.com/Reforma_kg/status/1295383077150240768
Дастан Бекешев парламенттин эки чакырылышынын депутаты болгон — ал 2010-жылы Жогорку Кеңешке «Ар-Намыс» партиясы менен келген, ал эми 2015-жылы бийликтин КСДП партиясы менен шайлоого катышкан. Ал парламентте иштеп турган убакта калк арасында белгилүү эмес болгон мыйзам долбоорлоруна бир нече жолу каршы чыккан.
Шайлоо 2020
Парламенттик шайлоо 2020-жылдын 4-октябрында өтөт. Учурдагы депутаттардын көбү парламентке келген партияларынан чыгып, келе жаткан шайлоого катышуу үчүн башка партияларга кошулууда.
Өзүн оппозициячыл партия деп көрсөткөн «Реформа» 2012-жылы түзүлгөн. Бирок келе жаткан шайлоого жаңы курамы менен катышат.
Партиянын башчысы юрист, Конституциялык соттун экс-судьясы Клара Сооронкулова болду. Партияга негизинен жарандык активисттер кирген.
«Биздин партия түп-тамырынан бери реформа жүргүзүү үчүн, Кыргызстанда түзүлүп калган коррупция системасын жана кланчылыкты жок кылуу жана элге кызмат кылган, башкы максаты адам болгон заманбап мамлекет куруу», — деп айтылат партиянын сайтында.
Мыйзамга ылайык, парламенттик шайлоого катышуу үчүн ар бир партия БШКга 5 млн сом шайлоо күрөөсүн бериши керек. Муну 20-августка чейин төлөө зарыл.
«Реформа» партиясынын мүчөлөрү 5 млн сом чогултууга жардам берүү өтүнүчү менен кайдыгер эмес жарандарга кайрылышкан. Партия 17-августта 2,3 млн сом чогултууга жетишкенин билдирген.