Бишкек шаарындагы Улуттук тарых музейинде COVID-19 пандемиясы менен күрөшкөн дарыгерлерге жана илдеттен көз жумган бейтаптарга арналган «Менин өмүрүм сизден көз каранды» аталышындагы сүрөт көргөзмө өтүп жатат.
Көргөзмөдө пандемияда соолуган өмүрлөр, калктын ден соолугу үчүн жан аябай күрөшкөн медиктердин, ыктыярчылардын эмгеги чагылдырылган.
COVID-19га каршы күрөшүү боюнча Республикалык штаб уюштурган көргөзмөгө 50дөн ашык сүрөт коюлган.
Cүрөт көргөзмөсү өтүп жаткан жерге коронавирустан сактануунун эрежелери жазылган түшүндүрмө барактар дагы жайгаштырылган.
