![](https://ky.kloop.asia/wp-content/uploads/sites/6/2022/02/tosmolor.jpg)
Чүй облусунун Кемин районундагы көрүстөндөн темир тосмолорду уурдоого шектелген киши кармалды. Бул тууралуу Чүй ОИИБдин басма сөз кызматынан 24-февралда билдиришти.
Алгач айрым ЖМКлар райондогу мүрзөлөрдүн темир тосмолорун белгисиз бирөөлөр сындырып жатышканы кабарланган. Ал эми Кемин райондук ички иштер башкармалыгынын кызматкерлери 10-февралда окуя болгон жерге барышып, териштирүүнү баштаган.
Ыкчам тергөө иш-амалдарынын натыйжасында кылмышка шектелип 39 жаштагы «И.А.» аттуу жаран кармалды. Ал күнөөсүн моюнуна алып, уурдаган темир тосмолорду темир-тезек сатып алуучу жайга өткөрүп жүргөнүн билдирген.
Милициядан шектүү тергөөгө жеткирилип, териштирүү иштери улантып жатканын кошумчалашты.