Минкабдын төрагасы Акылбек Жапаров Министрлер кабинетинин алдындагы Инвестициялык кеңешти түзүү жөнүндө документке кол койду. Бул тууралуу өкмөттүн басма сөз кызматы билдирди.
Жапаровдун айтымында, инвестициялык кеңеш Кыргызстандын өкмөтүнө караштуу бизнести өнүктүрүү жана инвестиция боюнча кеңештин негизинде түзүлгөн.
Мындай чечим, министрлер кабинетинен маалымдалгандай, бизнести өнүктүрүү, колдоо жана коргоо үчүн жагымдуу шарттарды камсыз кылуу, ошондой эле инвестициялык климатты жакшыртуу максатында кабыл алынды.
Мындан тышкары, кеңеш мамлекеттик-жеке өнөктөштүктү өнүктүрүүгө кызыктар адамдардын ишмердүүлүгүн координациялоону жакшыртуусу керек.
Мекеменин басма сөз кызматы белгилегендей, Инвестициялык кеңеш мамлекет менен бизнес-коомчулуктун ортосундагы эффективдүү диалогду камсыздоо максатында түзүлгөн консультациялык-кеңеш берүүчү орган.
2022-жылдын май айында Акылбек Жапаров Санариптик өнүктүрүү министрлигине караштуу Тундук мамлекеттик мекемесин түзүү жөнүндө токтомго кол койгон. Буга чейин Кыргызстанда «Тундук электрондук өз ара аракеттенүү борбору» мамлекеттик ишканасы бар болчу. Бирок 2021-жылдын декабрь айында ал кайра уюштурулуп, андан кийин Тундук «Инфоком» мамлекеттик ишканасынын курамына кирген.
