Президенттин Талас облусундагы ыйгарым укуктуу өкүлү Бакыт Нарбеков кызматын тапшырды. Анын ордуна Нурлан Дарданов облус башчысы болуп дайындалды. Тиешелүү буйрукка Садыр Жапаров 4-мартта кол койду.
Нарбеков башка ишке өткөнүнө байланыштуу кызматтан кеткени айтылды. Ал бул кызматта 2021-жылдын март айынан бери иштеп келген.
Ал эми 4-мартта Дардановду облустук администрациянын жамаатына министрлер кабинетинин төрагасынын орун басары Эдил Байсалов тааныштырды.
Дарданов Садыр Жапаровдун басма сөз катчысы Эрбол Султанбаев менен аталаш тууган экенин «Азаттыкка» ырастап, бул кызматка «тааныш-билиши аркылуу менен келди» деген сөздөрдү четке какты.
48 жаштагы Нурлан Дадранов Кара-Буура районунун Кызыл-Адыр айылында туулган. Ал 1996-жылы Улуттук университетинин юридика факультетин бүтүргөн.
1993-2018-жылдары Талас, Ысык-Көл, Нарын, Жалал-Абад облустарында жана жетекчилик кызматтарда иштеген. 2018-2020-жылдары ал башкы прокурордун биринчи орун басары болгон. Ал эми соңку эки жылдан бери Бишкек шаарынын мэринин кеңешчиси болуп иштеп келген.
