![](https://ky.kloop.asia/wp-content/uploads/sites/6/2023/05/1040491526_0_550_4692_3189_1920x0_80_0_0_d97884a766980b9df33957406e282f88.jpg)
Ош облусундагы Ноокат районунун 42 жаштагы тургуну 10 жашар баланы пневматикалык курал менен атып алды. Бул тууралуу 10-майда «Клоопко» облустук милициядан билдиришти.
Маалыматка ылайык, 2-майда Кызыл-Кыя шаардык милициясына Ноокат районунун Он-Эки Бел айылынын 10 жаштагы тургуну «үйүндө жыгылып», алган жараатынан улам аймактык ооруканага кайрылганы кабарланган.
Бирок алгачкы териштирүүдө жабырлануучу 1-май кечки саат 19:30 чамасында көчөдө ойноп жүргөндө 42 жаштагы коңшусу аны пневматикалык ок атуучу тир куралы менен «кокустан атып алып», Кызыл-Кыя шаардык ооруканасына алып барганы аныкталган. «Турмуш» басылмасы курал менен атып алган киши Он-Эки-Бел айыл өкмөтүнүн мурдагы башчысы болгонун жазды.
Ал эми 8-майда жабырлануучунун таенеси аталган окуя боюнча Ноокат РИИБге арыз менен кайрылган. Аталган факт боюнча териштирүү башталып, жарааттын оордугун аныктоо максатында соттук-медициналык экспертиза дайындалды.
Учурда тергөө уланып жатат.