Казакстандын полициясы Астана шаарындагы Kaspi банкында куралчан адам барымтага алган кишилерди бошотту. Ал эми шектүү колго түштү. Бул тууралуу 18-майда коңшу өлкөнүн полиция кызматынан кабарлашты.
«Аскердик операция ийгиликтүү жыйынтыкталды. Бардык кызматкерлер сыртка чыгарылды. Баскынчы куралсыздандырылды. Барымтага алынгандар да, шектүү да жабыркаган жок», — деп белгилешти полициядан.
Буга чейин жергиликтүү басылмалар барымтага алынган жети кыз жана бир кароолчу банктын кызматкери экенин жазган. Шектүү банктын активиндеги бардык акчаны майыптарга, колунда жок муктаждарга, жетим-жесирлерге которууну талап кылып, бул үчүн үч саат берген.
Кийин шектүүнүн аты-жөнү Алихан Мурадов экени аныкталып, анын аталган банкта кредити бар экени кабарланган.
Операция учурунда банктын айланасы курчоого алынып, имаратта жашаган тургундар батирлеринен чыгарылган.
