Өлкө башчы Барактыктарды Кыргызстандын аймагына көчүрүү «алардын жашоо шартын жана жай турмушун жакшыртууга карай маанилүү кадам» болорун айтты.
Буга чейин эксклавдын тургундары жарым-жартылай ээликтен ажыратуудан улам чек арадан өтүүдө олуттуу кыйынчылыктарга туш болушкан. Өзбекстан Баракты Кыргызстандын негизги бөлүгү менен байланыштырган эң кыска жолду жаап салган.
Кийин, «Кыргыз-Өзбек мамлекеттик чек арасынын айрым тилкелерин делимитациялоо жөнүндө» макулдашууга кол коюлган. Ага ылайык Кыргызстан Барак эксклавын Өзбекстанга өткөрүп берип, коңшу өлкө жооп иретинде Ош облусунун Кара-Суу районуна чектеш аймактан 208 гектар жерди Кыргызстанга өткөргөн.
Учурда Ош облусунун аймагында 38 гектар жерге Жаңы-Барак айылын куруу пландалууда. Анда 101 жаңы үй курулуп, 164 жаранга турак жай куруу үчүн сегиз сотых жерден бөлүнөт. Үйлөрдүн курулушун 31-августка чейин бүтүрүү пландалууда. Ошондой эле айылда мектеп, спорт имараттары, фельдшердик-акушердик пункт жана башка социалдык объектилер курулат.
Апрель айынын ортосунда кыргыз бийлиги Барак эксклавынын тургундарын көчүрүп келүүнү аяктаган. Жалпысынан 98 үй-бүлө Ош облусунун ар кайсы аймактарына убактылуу жайгашкан. Айрымдары туугандарыныкына, башкалары ижарага алынган турак жайларда отурукташкан.